الجمعة، 24 أكتوبر، 2008

النايل ساااااااااات غرق يا رجالة

النهاردة وبقدرة قادر
جيت استلم الشيفت كالعادة
وصلت لقيت القنوات غرقانة
والناس بتنزح المية واللا الغرقانين فى اعصار تسونامي
الغرف اللى المفروض مطابقة للمواصفات
وكاملة التجهيزات
السقف بتاعها بينقط من فوق ولا كأنها بيت مبني من 100 سنة
طب قولولي
احنا هنلاقيها من الماس الكهربائي
واللا من المطرة
انا خايف اروح الاقي بيتنا اتنقل من مكانه
واسأل يقولولي اصل حصل من شوية زلزال فى المنيب
مع ان بيتنا فى العباسية

الثلاثاء، 14 أكتوبر، 2008

تعرف تلعب بنتابول ..........!!!!!



تحب تلعب كرة خماسية من ماركة (صنع فى مصر) ،

وإيه هتلعبها بإيديك ورجليك

بس عايزين نتفق من الأول مفيش حد بيجري بالكورة اكتر من خمس ثواني

والفريق الواحد مبيخليش الكورة معاه اكتر من عشر ثواني ،

ومفيش حاجة اسمها تجيب جون كدة لوحدك ويتقال بقى هدف بمهارة فردية والنجم الأوحد للفريق وكدة ... لأ . لو الكورة معاك وانت داخل على مرمى الفريق المنافس لوحدك لازم يبقى معاك حد من زمايلك وانت تجهز الكرة للتسديد وزميلك هيسدد من غير ما الكورة تلمس الارض اصلا لان ممنوع فى اللعبة هنا ان الكورة تلمس الأرض ،

ولو الكورة لمست الارض بتتنقل فورا للفريق المنافس من مكان لمسها الارض .
أه نسيت قبل ما نبدا نلعب . ممنوع الفريق المهاجم يدخل منطقة جزاء الفريق التاني علشان يسجل هدف لان ده ممنوع ،

ولو فيه ضربة جزاء بيقف اتنين حراس مرمى وطريقة التسديد ممنوع فيها القوة ..انما دي بنقول عليها رفعة .
ده وصف بسيط للعبة من اكثر الالعاب سرعة وجماعية على وجه الارض
اللعبة هنا بتجمع بين خمس العاب (كرة اليد ، كرة الطائرة ، كرة القدم ، الرجبي الأمريكية ، كرة السلة )
البنتابول . اخترعها دكتور مصري اسمه (محمود حمدي احمد) عام 1984 وشافت النور عام 1989 وتأسس اتحادها فى مصر 1991
‏وتعتبر اللعبة من الالعاب الهوائية يعني اللى بتتلعب فى الهوا ،

وبتتلعب باليد الواحدة او الايدين والتصويب فيها بالرأس او بالقدم ونسبة الاصابة فيها قليلة جدا بالمقارنة بالالعاب الجماعية الأخرى .
ونظرا لسرعة اللعبة فيه خمس حكام للمباراه
والفريق بيتكون من خمس لاعبين فى الملعب لكل فريق ويعتبر ان مفيش حارس مرمى لان الحارس بيجري مع الفريق اثناء الهجوم

وأثناء الدفاع مش لازم أبدا يقف فى المرمى ‏

ومدة استحواذ اللاعب علي الكرة خمس ثوان والفريق عشر ثوان لهذا تعتبر أسرع لعبة في العالم

وتتطلب من لاعبها الاتقان والسيطرة علي الكرة والتفكير السليم وسرعة التحرك وسرعة رد الفعل والدقة والمرونة

وتأخذ من لعبة الكرة الطائرة مهارة الارسال الي الأسفل‏ وتأخذ من لعبة كرة السلة مهارة التمرير من فوق الرأس‏

‏ وتأخذ من كرة اليد مهارتي التمرير بيد واحدة والتمرير باليدين وتأخذ من الرجبي الأمريكية مهارة الجري بالكرة‏.


اسلام منسي


كلمتنا عدد شهر 7 عام 2008

الأحد، 5 أكتوبر، 2008

مالي ....


حاسس بحاجات جوايا مش فاهم ليه بتجيني
اوقات بصدقها وامشي وراها واوقات بديها ضهري وابص لطريقي وسكتي
( 1 )
حاسس رغم وجود ناس كتير حواليا بالوحدة
هما فعلا حواليا بس بحس كإنهم مش معايا
بيتجمعوا ويتقابلوا وبعدين اعرف انهم كانو فى المكان الفلاني بيعملوا كذا وكذا
ولما يحكولي اضحك وافرح لكن من جوايا اقول هو ليه محدش كلف نفسه وقالي متيجي معانا
بس ارجع واقول برضه يمكن لو كلموني كنت مش هاروح ...
بس حاجة تانية تقولي طب كانو يكلموك برضه واللا هما مش حاسين بيك خالص
واسأل نفسي هما بيحبوك
اقول اه
طيب بتحبهم ...
اقول أه
طيب في ايه
( 2 )
احساس تاني غريب ناحية اقرب الناس ليا بالكره .. بدا يزيد الفترة الاخيرة
كل حاجة حصلت معاه من زمان بتقولي انه معرفش يتعامل معايا من صغري
بحس انى وانا بتكلم معاه انى من كوكب تاني دماغ غير الدماغ نهائي
( 3 )
حلم عمري اللى قربت اقابله والمسه بعنيا وايديا
قلقان من يوم مقابلته
خايف لا السنين والظروف تفرقنا تاني
بس فى نفس الوقت عندي ايمان بنفسي وايمان بانه ما دمت ناوي خير يبقى ربنا ان شاء الله مش هيخذلني
( 4 )
حبيبي الاول والاخير اللى بعمل كل حاجة فى حياتي علشانه
مقصر معاه قوي من فترة
كل ما اقرب ابعد تاني
غباء
مفيش ارادة
مش عارف
بس اكيد انا اللى غلطان مش هوة
بحبه قوي قوي قوي
كفايه ان هو ... هو
( 5 )
انا مين ... سؤال كل يوم بسأله لنفسي
وكل يوم الاقي الاجابة
هي .. هي
بس فيه مشكلة انى كل يوم لازم الف وادور حوالين نفسي قبل ما أجاوبها
طيب ما انا اهو .. ليه بقى كل يوم احير نفسي كدة
مع انى عاجبني قوي يا أخي .. وواثق في نفسي قوي
وكل يوم اقول لنفسي : انت في ايه ياعم ... اهدى كدة وركز بقى
( 6 )
قادر اكون .. وهاكون
هو ده اللي انا عاوز ابقى هو
انى هاكون ... حاسس بان حلمي بيقرب .. ولكن فجاة وبغباء نفسي استراتيجي الاقيني بحس ان حلمي بعيد قوي
بس الثقة فى ربنا ملهاش حدود ..
بعمل اللى عليا ومبقولش كدة كفاية بطحن نفسي زي ما بيقولوا
اوقات بقول هدي نفسك شوية ... صحتك
لكن اصراري بيقولي لا انت اقوى وبعدين الصحة هتشيلها لامتى
اتعب دلوقتي علشان تقدر ترتاح بعدين
وانا اصلا مش بحب الراحة والكسل
يبقى شد حيلك وقوم يا عم اتحرك
وناوي مبطلش حركة ابدا ان شاء الله


.................
يـــــارب محتاجلك
اللهم انت ربي
لا إله الا انت
خلقتني وانا عبدك
وانا على عهدك ووعدك ما استطعت
اعوذ بك من شر ما صنعت
ابوء لك بنعمتك على
وأبوء بذنبي فأغفر لي
فإنه لا يغفر الذنوب إلا أنت