الأربعاء، 28 مايو، 2008

انا مش عارفني ........ !!!!!!


ايه ده ازاي ....

انت مين ياعم انت ...

ايه اللى بتقوله ده ....

امال ازاي يعني ....

وريني بطاقتك .....

كل دي افيهات او تعبيرات كلامية ممكن تطلع من البني آدم اللى قدامك لو سمع منك الكلمتين دول ((أنا مش عارفني))



بس لو فكرت فيهم هتلاقي نفسك اكيد فى يوم من الايام عديت بموقف فى حياتك اتصرفت فيه تصرف عجيب او غريب عن شخصيتك .


يعني ممكن تكون في يوم حاولت تروح ديسكو وانت مثلا شاب متدين وملتزم

او ممكن تكون فكرت تعاكس وانت شاب محترم ومهذب وعلى رأي صديقي ( مش متحرش )

عمرك فكرت تنزل البحر فى الغريق علشان تعوم


اي حاجة غريبة عن حياتك او عن طبيعتك او عن الوسط اللى انت عايش فيه وحاولت تعملها او فكرت حتى تعملها

ممكن يكون احساس فى حياتك

ممكن تكون فكرة مجنونة مختلفة تماما عن الطبيعي

يعني مثلا انك تمثل دور بواب عماره علشان تطلع تشوف حبيبتك اللى بقالك فترة مش عارف تشوفها

او مثلا فجأة تلاقي نفسك قاعد وسط مجموعة من المساطيل فى غرزة وانت اصلا لو شميت ريحة بيرفيوم اختك ممكن تقع من طولك

ممكن تكون اتحطيت فى موقف اضطرك تعمل حاجة مغايرة لطبيعة شخصيتك

زي انك تختلق قصة علشان تخرج بيها من مأزق حطك فيه المدير بتاعك ( وده الطبيعي فى كل الشركات دلوقتي )

او تتقمص دور المحب الولهان للمزة بتاعتك علشان تعيشها الخيال وتقتنع بيك وفجأة تلاقي نفسك بتقول كلام جااااامد وبعد ما تخلص تكتشف انك رومنسي او فى اللحظة دي بقيت رومنسي وغلبت عم الحاج قيس

ياريت كل واحد يدخل ويقولى امتى وفين كان مش هو.

الاثنين، 19 مايو، 2008

عايزين نبقى زيهم ....... !!!!



الدكتور الرائع علاء صادق كان مستضيف فى برنامجه الجميل هنا القاهرة اللاعب الشاب شريف عبد الفضيل مساك اساسي فى فريق الاسماعيلي .
وسيبك بقى من اي سؤال او اي حاجة فى البرنامج واسمع الحوار اللى دار بينهم لما سأله انت بتحب تلعب وانت معاك ليبرو واللا تلعب بدون ليبرو .. يعني بالمعنى المفهوم (تلعب 5 فى خط الدفاع واللا 4 فقط )
وكانت اجابة اللاعب الرائعة تنم عن عدم تركيز هايل فى الحوار
اجاب اللاعب الشاب : انا برتاح قوي وانا بلعب مع معتصم وهاني سعيد
وتدارك الموقف الدكتور علاء وقال : يعني بتحب تلعب 3-5-2 واللا 4-4-2
اجاب اللاعب : انا نفسي العب 4-4-2
ساله الدكتور علاء : ليه
اجاب : علشان نبقى زي الناس اللى بره

وانا هنا اسمحولي وبكل قوة ومن كل قلبي ومن داخل اعماق مشاعري اقول ( يانهار اسووووووود)
هو بقى كل طموح اللاعب المصري او كل فهمه عن طريقة 4-4-2 او -3-5-2 انه بس الناس اللى برة بيلعبو بيها واحنا لأ
هو ده فكر اللاعب المحترف في الزمن ده .. ماشاء الله .. يعني على كدة بقى احنا مالناش فى الكورة علشان مش بنعرف نلعب زيهم مع ان يا أخي احنا الفريق الوحيد فى بطولتي افريقيا الاخيرتين اللى كنا بنلعب كدة وكسبنا الكاس مرتين
وكمان البرازيل فى كاس العالم 2002 كسبت العالم بنفس الخطة والمانيا وصلت قبل نهائي كاس العالم 2006 وهي بتلعب بنفس الخطة وحصلت على المركز الثالث بجدارة واستحقاق
هو أه انا بعترف ان الناس دول حاجة واحنا حاجة بس ده ميمنعش اننا المفروض حتى نكون بنفهم نلعب بطريقة 3-5-2 ونعرف واجباتها علشان نعرف الفرق بينها وبين اي خطة تانية
طيب هنا فى سؤال ؟ ملح ؟
هما الناس دي ليه بنحس دايما انهم بيلعبو كورة غير اللى بنلعبها بعيدا عن الخطط واسلوب الاداء
ليه هما اسرع .. ليه هما اقوى ... ليه هما امهر واذكى ... ليه هما أغلى ... م الآخر ليه هما أنجح
انا هجاوب اجابة مختصرة نوعا ما علشان مش بحب الرغي وعلشان ده موضوع يطول شرحه
اولا الناس دول واخدين الكورة والرياضة عموما اقتصاد وعلم وشغل فى المقام الأول .
ثانيا اسلوب تدريب وتهيئة النشء من الصغر مبني على اسس علمية وتقييم اللاعب من صغره حتى وصوله للفريق الاساسي مبيخضعش لمجرد مدرب بيقول رأيه فيه زي ما حصل مع نجمنا محمد زيدان وهو صغير . انما هناك بيخضع لاسس وقواعد
ثالثا وجود ادارة مدربة على العمل ده مش مجرد تطوعية وشغل على الهامش ، لا بيدرسوا كل خطوة هيعملوها ايه وبيسألو الغلط هنا منين ومن مين وهنعالجه ازاي علشان ميحصلش تاني ، وكمان بيبقوا عارفين مواردهم قد ايه وهيشتغلوا من خلالها ازاي علشان ينجحوا ويطوروها
رابعا وجود قواعد موضوعة من اتحاد اللعبة فى الدولة لا يتدخل فيها انتماءات ويلتزم بيها الجميع دون النظر الى مكانته او قيمته

م الاخر الناس دول فاهمين يعني ايه احتراف
الاحتراف يعني التزام .. تفكير .. ابداع ... اهتمام .. اندماج ... تركيز ... دقة ... تطور .. مهارة .. سياسة .. وعي ... وممكن نقول كلام كتير قوي مش موجود عندنا وموجود عندهم
بس بصراحة وكلمة حق ... شريف عبد الفضيل جدع ... علشان اعترف وقال حلمه انه عاوز يبقى زيهم ... وانا كمان نفسي نبقى زيهم