الأربعاء، 28 مايو، 2008

انا مش عارفني ........ !!!!!!


ايه ده ازاي ....

انت مين ياعم انت ...

ايه اللى بتقوله ده ....

امال ازاي يعني ....

وريني بطاقتك .....

كل دي افيهات او تعبيرات كلامية ممكن تطلع من البني آدم اللى قدامك لو سمع منك الكلمتين دول ((أنا مش عارفني))



بس لو فكرت فيهم هتلاقي نفسك اكيد فى يوم من الايام عديت بموقف فى حياتك اتصرفت فيه تصرف عجيب او غريب عن شخصيتك .


يعني ممكن تكون في يوم حاولت تروح ديسكو وانت مثلا شاب متدين وملتزم

او ممكن تكون فكرت تعاكس وانت شاب محترم ومهذب وعلى رأي صديقي ( مش متحرش )

عمرك فكرت تنزل البحر فى الغريق علشان تعوم


اي حاجة غريبة عن حياتك او عن طبيعتك او عن الوسط اللى انت عايش فيه وحاولت تعملها او فكرت حتى تعملها

ممكن يكون احساس فى حياتك

ممكن تكون فكرة مجنونة مختلفة تماما عن الطبيعي

يعني مثلا انك تمثل دور بواب عماره علشان تطلع تشوف حبيبتك اللى بقالك فترة مش عارف تشوفها

او مثلا فجأة تلاقي نفسك قاعد وسط مجموعة من المساطيل فى غرزة وانت اصلا لو شميت ريحة بيرفيوم اختك ممكن تقع من طولك

ممكن تكون اتحطيت فى موقف اضطرك تعمل حاجة مغايرة لطبيعة شخصيتك

زي انك تختلق قصة علشان تخرج بيها من مأزق حطك فيه المدير بتاعك ( وده الطبيعي فى كل الشركات دلوقتي )

او تتقمص دور المحب الولهان للمزة بتاعتك علشان تعيشها الخيال وتقتنع بيك وفجأة تلاقي نفسك بتقول كلام جااااامد وبعد ما تخلص تكتشف انك رومنسي او فى اللحظة دي بقيت رومنسي وغلبت عم الحاج قيس

ياريت كل واحد يدخل ويقولى امتى وفين كان مش هو.

هناك 10 تعليقات:

Amr haggag يقول...

awaln ana lya elsharf any awl wa7d yakteb comment 3la el mawdo3 dah,kter ba2ol aeh dah?! dah mesh ana!!bs akter w2t 7aset feah an ana mesh ana awl ama sebt masr 7aset any wa7d tany mesh wa7d wa7sh bs wa7d `3aryb 3an 3amr ally kan fi masr kol 7aga `3areba bs gadeda wa 7lwa mankersh any mabsot australia bs kol 7aga `3aryba bs el mohem ank ama tt`3yr tt`3ayr llsa7 wa matnsash takledk wa 3adatk bs l7d dlw2ty ana brdo mesh 3arfny..baltwfe2 ya eslam wa ansh2 allah fe antzr elmawdo3 elgaded

غير معرف يقول...

فعلا الواحد احيانا بيعمل حاجات تختلف عن طبيعته دا ناتج اما عن حب لشخص ما او كسر روتين لفترة معينة او ان الواحد احيانا بيبقى عايز يبقى شخصية تانية غير اللي يعرفها عن نفسو انا وحدة جربت حاجات تختلف عن طبيعتى بس للاسف كانت نتائجها سلبية عليا ياريت لما حد يفكر انو يعمل حاجة تختلف عن طبيعته يفكر هل حتاثر عليه بالسلب ولا مش حتأثر

نورهان سراج يقول...

في الرحلات :(

بكون مش انا فيها
انا شخصيه مش شقيه اوي رغم اني لمضه اوي
لكن في الرحلات لازم ابقى شقيه اوي
ممكن اعمل حاجات مبحبش اعملها في حياتي العاديه
وفيه اوقات ببقى شريره فيها بصراحه :)

اسلام منسي يقول...

شيرين منصور
كلامك فى الجون

نورهان
ياريت متجربيش تطلعي معايا رحلة لانك هتكتشفيني وانا طفل
وانا بصراحة لما كنت طفل كنت بخاف من الشريرين
:d:d:d:d
ميغسي اول واحدة على فكرة تجاوب على الفكرة اللى اقصدها

غير معرف يقول...

بالنسبة لي في اوقات كتير لازم اكون فيها مش انا يعني في اوقات لازم اكون فيها قوية جدا وشديدة جدا جدا مع اني العكس ضعيفة جدا واقل حاجة ممكن تخليني اعيط وفي اوقات تانية لازم اكون فيها شريرة مع اني بكره الشر وبكره الناس الشريرة

اسلام منسي يقول...

كلام زي الفل
بس مين سيادتك

غير معرف يقول...

أولا أنت كلامك منطقى جدآ لأن كل واحد منا بيحس أو بيقوم بتصرفات أحيانآ بتكون غريبة عن شخصيته الطبيعية أو اللى بتظهر طول الوقت قدام الناس لكن مش معنى ذلك إنه يقول أنا مش عارف نفسى لأنها كلها حاجات بيفرضها عليك الموقف اللى انت فيه على سبيل المثال وليس الحصر:
1. أول مرةطلعت فيها رحلة حلوة ومع ناس أصحابك بتكون مبسوط معاهم أكيد عملت يومها حاجات مش بتعملها دايمآ لكن بتعملها على شان كل اللى معاك بيعملوا ده.
2. أول مرة تخرج فيها مع بنت حلوة لسه كنت مظبتها أكيد يومها عملت حاجة معملتهاش قبل كدة.

ثانيآ:
أنت بتكون عارف أنت مين وطبيعى كدآ زى أى حد وممكن متعملش أى حاجة من اللى بتوصفها انها غريبة إذآ الموضوع راجع للشخصية الأصلية وراجع كمان لمدى حبك للشىْ اللى انت عايز تتجنن وتعملوا ده بالأضافة إن فى مواقف بتفرض نفسها.

ُبلاش بس تقول تحرش والكلام ده لأن أصلآ راحت عليه البنات حاليآ هى اللى بتكون عايزة ده مش محتاج لتحرش.
والموضوع كأسلوب حلو وكافكرة كمان بس ظبط الكلام نفسه وخليه مربوط ببعضه
وعجبى

اسلام منسي يقول...

طبعا يا جماعة انا مش عارف ليه الناس مبتقولش اساميها فى التعليقات
يمكن خايفين من الشهرة
بس المهم اخر كومنت ده احب اعرفكو من احمد هيكل النجم السينمائي المغمور
ابو حميد
المقصود من الموضوع مش ان الواحد يبقى مش عارف نفسه لانه بقى حد تاني وهو بيتصرف مثلا انما هو اكتشف فى نفسه الحاجة دي او عمل تصرف غريب عن شخصيته مش اكتر
يعني ممكمن التصرف مش معاكس للمبادئ لكن هو لو حد شافه فى الموقف ده مش هيصدقه
يعني لو حد لقى عمرو دياب لابس هدوم زي شعبان عبد الرحيم اكيد هنستغرب بس هي طقت فى دماغه كده
والحمد لله مفيش غير نورهان اللى فهمت الموضوع مش عارف ليه يمكن انا كتبه بلغه عباساوية شرقية مثلا :D:D:D

كركوبة يقول...

اكيد لازم اكون عملت حاجه مش شخصيتى
اقربها عملت نفسي مقموصة
وانا مش من طبعى قوى انى اتقمص
بس لقيت صحبتى اتقمصت قمت قلت قلت عقل ب قلت عقل والله لا اعرفها يعنى ايه قلة عقل وسبتلها المواصلة ونزلت منها
وروحت ركبت مواصلة تانية مش علشان انا زعلانة بس علشان اوريها يعنى ايه تفاهه

وبس
بعدها معاملتها اتظبطت وحسيت ان حيلتى نجحت
تحياتى / كركوبة

dr_samarmar يقول...

بكل صراحة أنا اتصرفت على غير طبيعتى فى بعض الأحيان

أولا: لما حبيت ,,, أنا أصلا ماكنتش مقتنعة بفكرة ان فى حاجة اسمها حب بين اتنين مش مرتبطين رسمى

و لما حبيت فضلت لمدة سنة واحدة تانية غير شخصيتى تماما فى كل حاجة بصراحة كنت زمان كئيبة فى الفترة اللى حبيت فيها كنت مرحة جدا كنت مدب و بعدين لما حبيت بقيت بحس بالناس و بلتمس الأعذار ... كانت أحلى أيام فى حياتى بجد افتكرتها أوى دلوقتى :)


ثانيا: لما كرهت , طول عمرى طيبة و بتمنى الخير حتى للى بيجرحنى لحد ماجت واحدة صاحبتى طعنتنى فى ضهرى

حسيت ساعتها بحاجات عمرى ما حسيت بيها قبل كدا حسيت بكل ألوان البغض و الحقد و الانتقام
مجرد احساس انى أكره كان جديد عليا و مش من طبيعتى خالص و الحمد لله بردو الأيام دى راحت لحالها :)

بوست جميل يا اسلام و فكرته حلوة أوى