الجمعة، 20 يونيو 2008

نصيحة ...... احترم نفسك


احترم نفسك
يااااااااااااااه
اول ما اي واحد في مصر يسمعها من اي حد تاني هيفتكر لاول وهلة انه بيهزأه
لاننا اتربينا بيها غلط مع انى شايفها فى الاساس نصيحة جميلة ممكن تخلي المجتمع من الطفل للكهل يحترم نفسه
الطفل وهو صغير لما بيعمل حاجة غلط او عيب تلاقي اول كلمة تقولهاله امه " إحترم نفسك "
وبتبقى الكلمة طالعة بزعيق واشمئزاز غريب .. وده بيخلي الطفل اللى مش فاهم طبعا معنى الكلمة انه يكرهها
ولو اتكررت تاني من حد بيحبه مش هيسمع الكلام ومش هيحترم نفسه
وده لان الكلمة دي بتطلع من غير ابداء سبب
يعني هيحترم نفسه من ايه
ايه بالظبط فى اللى عمله غلط وايه نتيجته علشان يبقى فاهم هو يحترم نفسه ازاي وليه
انا عن نفسي ممكن انصح زميلي او صاحبي لو عمل حاجة مش ظريفة فى مكان عام
مثلا انه يعلي صوت الاغاني بتاعة الموبايل قوي علشان يسمع كويس .. بس هو مش عارف ان ده بيإزي ودان غيره ..
هنا ممكن اقوله احترم نفسك علشان الناس تحترمك ..
افرض انك تعبان وفيه حد عمل زيك كدة مش انت هتدايق ويمكن تزعقله ..
يبقى ليه تجيب قلة الاحترام لنفسك ..

بص دايما على نفسك الاول لو انت اتحطيت فى الموقف ده
الموضوع مش تحرش وخلاص
التحرش هو اساس الحملة لكني بتكلم عن المبدأ نفسه الكلمة (( احترم نفسك ))

احترم نفسك كلمة بتلم كل المبادئ فى مصطلح اروع ما فيه انه هادف وقوي وله مغزى

احترم نفسك حملة اطلقتها مجلة كلمتنا يارب تأثر فى الناس

يارب كل واحد ياخد الكلمة كـنصيحة مش كإنها تهزيق لا سمح الله

احترم نفسك .. قولها لنفسك لابنك لباباك لاخوك لصاحبك

الكلام كتير فى الموضوع ده ولسة متقفلش ....

هناك 4 تعليقات:

Rannon يقول...

كلام مظبوط
إحترم نفسك مش شتيمة دي نصيحة
لأن الواحد لازم يحترم نفسه عشان الناس تحترمه..
تحياتي

dr_samarmar يقول...

و تصدق يا اسلام و الله ماحسيت بمعنى الكلمة دى غير لما تابعت الحملة ع المجلة ,,,

بجد معناها حلو أوى لما الانسان يحترم ذاته هيتكسف يعمل حاجات كتير أوى كان بيعملها ,و ياريت كلنا نحترم نفسنا

بالنسبة لموضوع التحرش بقا اللى مش عارفة أوصفه فهو حاجة من أقذر مايكون
حاجة بتضيع كرامة الولد و بتضيع احترامه لنفسه قبل احترام الناس ليه
بس بجد.. هو موضوع يستاهل النقاش لأنه بيحصل كل يوم و ف كل مكان و لجميع أنواع البنات


و طبعا أسباب التحرش كتيرة جدا منها سوء التربية و الاعلام البايظ و البعد عن الدين و الأنانية و تفاهة العقول و الفراغ ,.......

بوست جميل :)

AVINGER يقول...

كلام بعد إحترامى للجميع مش واقعى
لأن لما تقول لحد إحترم نفسك فده معناه إنه مش محترم وده سب علنى
لما تقول لواحد إتأدب إذن فهو مش مؤدب
السلام عليكم وتحياتى

إسلام منسي يقول...

كلامك معقول برضه يا ... avinger
بس فكرة الموضوع اللى انا كاتبه
اننا نربي اولادنا انهم ميخافوش من الكلمة دي
لانها بتتقال للى مش محترم
انما ازاي ولد فى سن مبكرة من عمره هنقوله احترم نفسك وهيفهمها صح
مش لازم برضه يفهم الكلمة دي معناها ايه وبتتقال لمين
شكرا جدا على مرورك وياريت لو نتعرف اكتر
بالمناسبة يعني ايه avinger