الثلاثاء، 24 يونيو، 2008

عملنا اللى علينا .... والباقي على الله

كل واحد دلوقتي من الطلبة بتوع الثانوية العامة او فى الجامعة .. تيجي تقوله عملت ايه فى الامتحان ؟
يقولك .. انا عملت اللى عليا بصراحة وربنا يستر فى الامتحان..
وتسأله ان كان ذاكر والا لا يقولك انا الحمد لله ذاكرت ومظبط وعملت اللى عليا وربنا يسهل بقى ..
تروح لواحد فى الشغل وتسأله ايه اخبار الشغل يقولك احنا عملنا اللى علينا وان شاء الله الموضوع يمشي كويس ..
تروح لمدير شركة وتسأله اخبار المشروع ايه .. تلاقي نفس الرد

طيب يا جماعة هو لو فعلا كل واحد بيعمل اللى عليه كان فضل ده حالنا ..
يعني الو المدرس بيلتزم بالمنهج وبطريقة تدريس كويسة وبيعمل اللى يمليه عليه ضميره كان ده بقى حال التعليم ..
والطالب برضه اللى تحت ايده لو بيذاكر كويس وبيسأل فى اللى ميعرفوش علشان يعرفه ويتعلم ويكتسب معرفه
كان ده بقى حاله فى اخر السنة ...
واللا الاب والام لو بيربو ولادهم تربية كويسة على الاخلاق والقيم كان ده بقى حال الشارع المصري
من الفاظ بزيئة وتحرش وعدم احترام واسلوب سخيف فى التعامل ...

والاسوأ لما تقابل اي حد فى اي مكان يقولك انا عملت اللى عليا خلاص
الصاحب يقولك انا نصحت صاحبي وعملت اللى عليا يولع بقى بعد كدة (اللى بيشيل قربة مخرومة م الاخر) ..
طيب بزمتكو ده صاحب بجد

حتى الاب .. يقولك يابنى انا قلتلك الصح فين والغلط فين وعملت اللى عليا ..
تفتكروا يعني ان ده دور الاب فعلا انه يقول وينصح وخلاص ويبقى كدة ادى واجبه على اكمل وجه ..

الناظر ... والمدير ... والدكتور .. والوزير ... والطالب .. والغفير ... وغيرهم
لو كل واحد فى دول وغيرهم (البلد كلها) يعمل اللى يمليه عليه ضميره
ويعمله بكل جد والتزام مع النفس قبل التزامه مع الغير
فعلا نقدر نسيبها بعد كدة على ربنا ونقول عملنا اللى علينا والباقي على الله ...

هناك 6 تعليقات:

Ma7moud So3ody يقول...

يا اسلام يا جامد

تحياتي ليك يا معلم

شقيقك سعودي
:)))))

Rana يقول...

كل واحد عمل اللي عليه
بس من وجهة نظره :)

تحياتي

dr_samarmar يقول...

ياريت فعلا كان دا بيحصل

أى مؤسسة أو جهاز أو أى عمل بسيط مش شغال كويس اعرف ان معظم أصحابه حاسين انهم مش عاملين اللى عليهم و ضميرهم مأنبهم دا لو ماكمش كلهم

اسلام منسي يقول...

dr_samarmar
انا فرحان جدا بدخولك المدونة
ومتشكر على تعليقاتك المفيدة

رؤى نزار يقول...

المشكلة الحقيقة بقى
انو رواتب المدرسين و الاهتمام بيهم مش كويس خالص في دولنا العربية و بيخلوه دايما تعبان وقرفان
وتانيا المناهج اللي بقت مملة و مفهاش فايدة خالص
المدراس نفسها بقى فيها تمييز اللي يدفع اكتر يحصل تعليم احسن مع انو التعليم حق لكل الناس بس للاسف الايام دي الفلوس تجيب فلوس غير كده لازم تعاني مليون مرة عشان توصل لربع اللي بيوصله اللي معاه فلوس حتى في ابسط الامور زي التعليم

اسلام منسي يقول...

رؤى
هو ده الكلام
بس ده من وجهة نظر التعليم بس
ربنا يسهل واحنا كمان منبقاش متواكلين ونقول عملنا اللى علينا والباقي على ربنا
تسلم ايدك