بحبك وخايف تزهقي

امتى ممكن البنت تزهق من حبيبها
او الولد يزهق من حبيبته
.
.
بحبك وخايف تزهقي
؟؟؟؟؟؟؟؟؟؟؟

لأجلك

لأجلك .... جلست أمحو ذاكرتي

وبقيت وحدي أطل على مرآة عمري

وجلست فى ظل الهوى ابحث عن طريق

لأجلك ... تركت عقلي

وأضحيت مجذوب يبحث عن ضريحك

ليغفو بجانبه يدعو ويناجي طيفك

لأجلك ... هجرت وطني

وبحثت فيك عن وطن

ووجدته فى عينيك

وطن المحبين والعشق والهوى

عينيك سيدتي نار ونور

عينيك ملجأ يهرب المحبين فيه من برد الفتور

عينيك سيدتي بحر ورموشك شطئان نجاه

يرسو عليها الحب ينعم فى هدوء

لعينيك يا جميلتي

محوت الهموم ... وأضاأت الغيوم

وبقيت طول الليالي ساهر وسط النجوم

أحدثها عن روعة الحب

وتحدثني عن جمال عينيك

أيا قلب امتلكني .. انى وهبت قلبي اليك

فلأجلك تركت نفسي

ولأجلك ابقى دوما عاشقاٍ

النايل ساااااااااات غرق يا رجالة

النهاردة وبقدرة قادر
جيت استلم الشيفت كالعادة
وصلت لقيت القنوات غرقانة
والناس بتنزح المية واللا الغرقانين فى اعصار تسونامي
الغرف اللى المفروض مطابقة للمواصفات
وكاملة التجهيزات
السقف بتاعها بينقط من فوق ولا كأنها بيت مبني من 100 سنة
طب قولولي
احنا هنلاقيها من الماس الكهربائي
واللا من المطرة
انا خايف اروح الاقي بيتنا اتنقل من مكانه
واسأل يقولولي اصل حصل من شوية زلزال فى المنيب
مع ان بيتنا فى العباسية

اه بحبك من سكات

اه بحبك من سكات

تعرف تلعب بنتابول ..........!!!!!

تحب تلعب كرة خماسية من ماركة (صنع فى مصر) ،

وإيه هتلعبها بإيديك ورجليك

بس عايزين نتفق من الأول مفيش حد بيجري بالكورة اكتر من خمس ثواني

والفريق الواحد مبيخليش الكورة معاه اكتر من عشر ثواني ،

ومفيش حاجة اسمها تجيب جون كدة لوحدك ويتقال بقى هدف بمهارة فردية والنجم الأوحد للفريق وكدة ... لأ . لو الكورة معاك وانت داخل على مرمى الفريق المنافس لوحدك لازم يبقى معاك حد من زمايلك وانت تجهز الكرة للتسديد وزميلك هيسدد من غير ما الكورة تلمس الارض اصلا لان ممنوع فى اللعبة هنا ان الكورة تلمس الأرض ،

ولو الكورة لمست الارض بتتنقل فورا للفريق المنافس من مكان لمسها الارض .
أه نسيت قبل ما نبدا نلعب . ممنوع الفريق المهاجم يدخل منطقة جزاء الفريق التاني علشان يسجل هدف لان ده ممنوع ،

ولو فيه ضربة جزاء بيقف اتنين حراس مرمى وطريقة التسديد ممنوع فيها القوة ..انما دي بنقول عليها رفعة .
ده وصف بسيط للعبة من اكثر الالعاب سرعة وجماعية على وجه الارض
اللعبة هنا بتجمع بين خمس العاب (كرة اليد ، كرة الطائرة ، كرة القدم ، الرجبي الأمريكية ، كرة السلة )
البنتابول . اخترعها دكتور مصري اسمه (محمود حمدي احمد) عام 1984 وشافت النور عام 1989 وتأسس اتحادها فى مصر 1991
‏وتعتبر اللعبة من الالعاب الهوائية يعني اللى بتتلعب فى الهوا ،

وبتتلعب باليد الواحدة او الايدين والتصويب فيها بالرأس او بالقدم ونسبة الاصابة فيها قليلة جدا بالمقارنة بالالعاب الجماعية الأخرى .
ونظرا لسرعة اللعبة فيه خمس حكام للمباراه
والفريق بيتكون من خمس لاعبين فى الملعب لكل فريق ويعتبر ان مفيش حارس مرمى لان الحارس بيجري مع الفريق اثناء الهجوم

وأثناء الدفاع مش لازم أبدا يقف فى المرمى ‏

ومدة استحواذ اللاعب علي الكرة خمس ثوان والفريق عشر ثوان لهذا تعتبر أسرع لعبة في العالم

وتتطلب من لاعبها الاتقان والسيطرة علي الكرة والتفكير السليم وسرعة التحرك وسرعة رد الفعل والدقة والمرونة

وتأخذ من لعبة الكرة الطائرة مهارة الارسال الي الأسفل‏ وتأخذ من لعبة كرة السلة مهارة التمرير من فوق الرأس‏

‏ وتأخذ من كرة اليد مهارتي التمرير بيد واحدة والتمرير باليدين وتأخذ من الرجبي الأمريكية مهارة الجري بالكرة‏.


اسلام منسي

كلمتنا عدد شهر 7 عام 2008

مالي ....

حاسس بحاجات جوايا مش فاهم ليه بتجيني
اوقات بصدقها وامشي وراها واوقات بديها ضهري وابص لطريقي وسكتي
( 1 )
حاسس رغم وجود ناس كتير حواليا بالوحدة
هما فعلا حواليا بس بحس كإنهم مش معايا
بيتجمعوا ويتقابلوا وبعدين اعرف انهم كانو فى المكان الفلاني بيعملوا كذا وكذا
ولما يحكولي اضحك وافرح لكن من جوايا اقول هو ليه محدش كلف نفسه وقالي متيجي معانا
بس ارجع واقول برضه يمكن لو كلموني كنت مش هاروح ...
بس حاجة تانية تقولي طب كانو يكلموك برضه واللا هما مش حاسين بيك خالص
واسأل نفسي هما بيحبوك
اقول اه
طيب بتحبهم ...
اقول أه
طيب في ايه
( 2 )
احساس تاني غريب ناحية اقرب الناس ليا بالكره .. بدا يزيد الفترة الاخيرة
كل حاجة حصلت معاه من زمان بتقولي انه معرفش يتعامل معايا من صغري
بحس انى وانا بتكلم معاه انى من كوكب تاني دماغ غير الدماغ نهائي
( 3 )
حلم عمري اللى قربت اقابله والمسه بعنيا وايديا
قلقان من يوم مقابلته
خايف لا السنين والظروف تفرقنا تاني
بس فى نفس الوقت عندي ايمان بنفسي وايمان بانه ما دمت ناوي خير يبقى ربنا ان شاء الله مش هيخذلني
( 4 )
حبيبي الاول والاخير اللى بعمل كل حاجة فى حياتي علشانه
مقصر معاه قوي من فترة
كل ما اقرب ابعد تاني
غباء
مفيش ارادة
مش عارف
بس اكيد انا اللى غلطان مش هوة
بحبه قوي قوي قوي
كفايه ان هو ... هو
( 5 )
انا مين ... سؤال كل يوم بسأله لنفسي
وكل يوم الاقي الاجابة
هي .. هي
بس فيه مشكلة انى كل يوم لازم الف وادور حوالين نفسي قبل ما أجاوبها
طيب ما انا اهو .. ليه بقى كل يوم احير نفسي كدة
مع انى عاجبني قوي يا أخي .. وواثق في نفسي قوي
وكل يوم اقول لنفسي : انت في ايه ياعم ... اهدى كدة وركز بقى
( 6 )
قادر اكون .. وهاكون
هو ده اللي انا عاوز ابقى هو
انى هاكون ... حاسس بان حلمي بيقرب .. ولكن فجاة وبغباء نفسي استراتيجي الاقيني بحس ان حلمي بعيد قوي
بس الثقة فى ربنا ملهاش حدود ..
بعمل اللى عليا ومبقولش كدة كفاية بطحن نفسي زي ما بيقولوا
اوقات بقول هدي نفسك شوية ... صحتك
لكن اصراري بيقولي لا انت اقوى وبعدين الصحة هتشيلها لامتى
اتعب دلوقتي علشان تقدر ترتاح بعدين
وانا اصلا مش بحب الراحة والكسل
يبقى شد حيلك وقوم يا عم اتحرك
وناوي مبطلش حركة ابدا ان شاء الله


.................
يـــــارب محتاجلك
اللهم انت ربي
لا إله الا انت
خلقتني وانا عبدك
وانا على عهدك ووعدك ما استطعت
اعوذ بك من شر ما صنعت
ابوء لك بنعمتك على
وأبوء بذنبي فأغفر لي
فإنه لا يغفر الذنوب إلا أنت

بحبك معرفش ليه .... !!

بحبك يا بلدي
بحبها وهي بترابها وبنيلها
وعنيها السودا المكحلة
بحبها زي ماهيا
بكل مافيها وكل ما فيا
بحبك
بحبك وانتى حضناني
جوة عينك وماسكاني
بحبك وانتى معدياني طريق مسدود
وانتى ماسكة ايدي بعيونك السود
وانتى واقفة جوة قلبي بترقصي
وانتى جنبي جوة ودني بتهمسي
ذكريات جوايا ..
حلوة ،،، وحشة ... لايمكن تتنسي
ياااااااااااااااه بحبك ..
معرفش ليه
جوة قلبي قاعدة مربعة
معرفش ليه
واقفة وقفة متدلعة ...
معرفش ليه
بنت حلوة .. بنت جدعة
اختى .. امى ..
حبيبتي .. بنتي..
مبسالش مين او ليه
المهم انى بحبك
جوايا عايشة ..
وف قلبي ماشية
جنب الاورطة
بتخرجيني من الف ورطة
راكب اتوبيس بشرطة ....

اسلام منسي

حاول تتغير ...

كان بابا وانا صغير بيقولي خد صاحبك على عيبه وكان يقصد بكدة ان ما دمت رضيت بيه صاحبك وهو فيه عيب معين ممكن تتجنب التعامل معاه فى العيب ده بس متخسروش لانى زمان كنت لما بلاقي واحد صاحبي مثلا بيعاكس بنت او بيشرب سجاير او بيعمل اي حاجة مش بتعجبني كنت ببعد عنه واقاطعه تقريبا ... والحكاية دي خلتني اعرف اتعامل مع اصحابي واعرف اقرب منهم ... وبدات بقى احاول اغير فيهم الحاجات دي وفيه منهم اللى كان بيقبل النصايح وفيه منهم اللى كان بيقولي انا كدة ومش هتغير وكنت برضى بيه زي ما هو برضه وبكمل حياتي معاه .

ولكن فكرة التغيير فضلت برضه فى دماغي ياترى لو قابلت حبيبتي وكان في حاجة فى تصرفاتها او فى طبيعتها مش عجباني لازم تتغير واللا برضه احبها كدة زي ما هيا

فيه فى الموضوع ده شوية نظريات بقى زي نظرية (( انا زي منا ومش هتغير علشان اي بني ادم )) ودي نظرية الواثق جدا فى نفسه او اللى حاول يتغير قبل كدة علشان حد واتصدم فيه فى الاخر فا قرر انه ميتغيرش نهائي علشان اي حد ولو قلتله طبيعي اننا نحاول نرضي اللى بنحبهم هتلاقي الاجابة فى وشك على طول .. هو لما الحد ده حبني مش حبني زي منا كدة واللا كان شايف حد تاني ...

وفيه نظرية (( علشان حبيبي اعمل اي حاجة )) ودي اصحابها بيبقوا ناس طيبيب وغالبا بتبقى تجاربهم قليله حبتين وجواهم اتجاه لحب اللى حواليهم ومحاولة ارضائهم باي شكل

وفيه بقى نظرية جبارة اصحابيها واخدين مبدا فظيع تحس انهم تجار مخدرات مثلا والنظرية دي اسمها (( هات وخد )) يعني م الاخر كدة لو هو مش موافق يتغير علشاني انا مش هتغير علشانه والحياه بطبيعتها هات وخد لازم الكل يقدم تنازلات مش واحد بس ..

بيني وبينكو كدة فيه فى كل نظرية من النظريات جزء سليم شويتين بس فكرة التغيير برضه شايفها تستحق التفكير والتدقييق وابص الاول انا بتغير ليه ولمين وياترى التغيير ده كويس واللا لا فى العموم وياترى اتغير فى الاساس لنفسي واللا اتغير علشان حد معين عاوزني كدة

انا عن نفسي بنصح دايما بالتغيير للاحسن ايا كان ايه السبب المهم نبقى احسن .... وحاول تتغير

انا عاوز ابقى بكرش

انا قررت بكامل قواي العقلية والفكرية انى ابقى بكرش واتخن
مش حبا فى التخن بالعكس
انا مؤمن جدا بان الرياضة للجميع
والجسم السليم فى العقل السليم
بس يا جماعة فيه دراسة اثبتت ان 80% من البشر التخان دمهم خفيف ومحبوبين
وقليل جدا لما تقابل واحد تخين ويكون رخم
وكمان تلك الدراسات اثبتت ان التخن بيتناسب طرديا وخفة الدم
ويتناسب عكسيا مع الرخامة والغلاسة
فا ليه مبقاش بكرش
وتخين وفشلة

فخور باني بكرش

معرفش ليه تنحت للدنيا كدة .....

قالها على سلامة ويمكن في باله كان موجود ملايين المصريين
او المصريين كلهم تقريبا
كله ماشي متنح
حتى اللى عارف طريقه وماشي في سكته ومحدد هدفه
بيبقى ليه وقت كدة بيتنح فيه ويبقى مش عايز يعمل حاجة
كل واحد مننا بيعدي عليه ظروف ممكن تخليه يتنح حبتين
يبقى ماشي فى الشارعمن غير اتجاه
يبقى حاسس انه تايه او غير متزن
يبقى حاسس بعدم الرغبة فى الحياه
وحاسس انه مفيش فايدة
.
هو فيه فايدة بس هو حاسس انه مفيش فايدة
فجأة احساس بعدم الامان
وعدم الاستقرار
.
بتحصلكو الحالة دي
بتخرجو منها ازاي
وياترى هي مفيدة واللا مضرة

خارج النص : وحشتوووووني

بيتي .... عيلتي ... اصحابي ... شغلي ... مستقبلي ... كلمتنااااا

بيتي التاني بجد ومش اي كلام
مكان لقيتني فيه
انا كنت هناك من جوايا زمان
ولما روحت قابلتني هناك
انا فيها عارفني ... انا فيها انا .. مش حد تاني
بحب كل حاجة فيها
صبري للمرة المليووووووووووووووون بعشقك
حسين بموت فى ضحكتك
كل حد قابلته هناك او شفته بس هو مني
سعودي ... تسلم ايدك يا سيد المعلمين .. مفيش زيك تاني
نووووري ... كفاية اقولك انى كنت بحلم بس اسلم عليكي
محمد طه ... معرفش انا شوفتك فين قبل كدة .. اكيد جوة نفسي
ريم عادل ... بحس ان انتى اختى اللى مكانش ليا نصيب وتبقى معايا دلوقتي
عادل جمال ... طويل قوي بس بموت فى دماغك يابن الايه ...
آية .... واحد صاحبي ( وش بيضحك ) بموت فى ابتسامتها
سنهوري ... اخويا الصغير اللى بحب ارخم عليه علشان بحبه
مروة ابراهيم .. مينفعش اقول غير انى بعزك من غير ما اعرف ليه بس تسمعي الكلام وتجيبيلي موز باللبن
احمد نشأت ... بحبك ياد ... بس خليك بتضحك
أسماء صلاح ... هاجيبلك بوستر مهند كبير قوي بس الاقيه (وش بيضحك قووووووي )

مصطفى فتحي .... انت وبس .. مفيش تاني مصطفى فتحي
مروة عووووووووض ... بحبك لما تبصيلي وتضحكي .. بطير والله

نهاااااااااااااااااااااااال .. الجميلة الجدعة مش عارف اقولك ايه .. لما بتندهيلي علشان اعمل حاجة بحس انى اهم واحد فى الدنيا

كلمتناااااااااااااااااااااااااااااااااااااااااااااا وبس مش حاجة تانية

تهامي ومصطفى وصبري .................. بحبكو قوي

محمد تهامي و مصطفى فتحي
بني ادم مع وقف التنفيذ و ما تيجي ننجح

تهامي ومصطفى
اتنين عرفتهم فى وقت قليل جدااااااااااا
وصبري سراج
السبب فى معرفتي بيهم
بحبكو قوووووووووووووووووووووووووووي
اجمل ناس فى الدنيااااااااااااااااا

يارب بالتوفيق ليكو كلكووووو
مفيش كلام عارف اقوله
ولا اوصف بيه حبي ليكو

عملنا اللى علينا .... والباقي على الله

كل واحد دلوقتي من الطلبة بتوع الثانوية العامة او فى الجامعة .. تيجي تقوله عملت ايه فى الامتحان ؟

يقولك .. انا عملت اللى عليا بصراحة وربنا يستر فى الامتحان..

وتسأله ان كان ذاكر والا لا يقولك انا الحمد لله ذاكرت ومظبط وعملت اللى عليا وربنا يسهل بقى ..

تروح لواحد فى الشغل وتسأله ايه اخبار الشغل يقولك احنا عملنا اللى علينا وان شاء الله الموضوع يمشي كويس ..

تروح لمدير شركة وتسأله اخبار المشروع ايه .. تلاقي نفس الرد

طيب يا جماعة هو لو فعلا كل واحد بيعمل اللى عليه كان فضل ده حالنا ..

يعني الو المدرس بيلتزم بالمنهج وبطريقة تدريس كويسة وبيعمل اللى يمليه عليه ضميره كان ده بقى حال التعليم ..

والطالب برضه اللى تحت ايده لو بيذاكر كويس وبيسأل فى اللى ميعرفوش علشان يعرفه ويتعلم ويكتسب معرفه

كان ده بقى حاله فى اخر السنة ...

واللا الاب والام لو بيربو ولادهم تربية كويسة على الاخلاق والقيم كان ده بقى حال الشارع المصري

من الفاظ بزيئة وتحرش وعدم احترام واسلوب سخيف فى التعامل ...

والاسوأ لما تقابل اي حد فى اي مكان يقولك انا عملت اللى عليا خلاص
الصاحب يقولك انا نصحت صاحبي وعملت اللى عليا يولع بقى بعد كدة (اللى بيشيل قربة مخرومة م الاخر) ..

طيب بزمتكو ده صاحب بجد

حتى الاب .. يقولك يابنى انا قلتلك الصح فين والغلط فين وعملت اللى عليا ..

تفتكروا يعني ان ده دور الاب فعلا انه يقول وينصح وخلاص ويبقى كدة ادى واجبه على اكمل وجه ..

الناظر ... والمدير ... والدكتور .. والوزير ... والطالب .. والغفير ... وغيرهم
لو كل واحد فى دول وغيرهم (البلد كلها) يعمل اللى يمليه عليه ضميره

ويعمله بكل جد والتزام مع النفس قبل التزامه مع الغير

فعلا نقدر نسيبها بعد كدة على ربنا ونقول عملنا اللى علينا والباقي على الله ...

نصيحة ...... احترم نفسك

احترم نفسك
يااااااااااااااه
اول ما اي واحد في مصر يسمعها من اي حد تاني هيفتكر لاول وهلة انه بيهزأه
لاننا اتربينا بيها غلط مع انى شايفها فى الاساس نصيحة جميلة ممكن تخلي المجتمع من الطفل للكهل يحترم نفسه
الطفل وهو صغير لما بيعمل حاجة غلط او عيب تلاقي اول كلمة تقولهاله امه " إحترم نفسك "
وبتبقى الكلمة طالعة بزعيق واشمئزاز غريب .. وده بيخلي الطفل اللى مش فاهم طبعا معنى الكلمة انه يكرهها

ولو اتكررت تاني من حد بيحبه مش هيسمع الكلام ومش هيحترم نفسه
وده لان الكلمة دي بتطلع من غير ابداء سبب
يعني هيحترم نفسه من ايه
ايه بالظبط فى اللى عمله غلط وايه نتيجته علشان يبقى فاهم هو يحترم نفسه ازاي وليه
انا عن نفسي ممكن انصح زميلي او صاحبي لو عمل حاجة مش ظريفة فى مكان عام

مثلا انه يعلي صوت الاغاني بتاعة الموبايل قوي علشان يسمع كويس .. بس هو مش عارف ان ده بيإزي ودان غيره ..

هنا ممكن اقوله احترم نفسك علشان الناس تحترمك ..

افرض انك تعبان وفيه حد عمل زيك كدة مش انت هتدايق ويمكن تزعقله ..

يبقى ليه تجيب قلة الاحترام لنفسك ..

بص دايما على نفسك الاول لو انت اتحطيت فى الموقف ده
الموضوع مش تحرش وخلاص
التحرش هو اساس الحملة لكني بتكلم عن المبدأ نفسه الكلمة (( احترم نفسك ))

احترم نفسك كلمة بتلم كل المبادئ فى مصطلح اروع ما فيه انه هادف وقوي وله مغزى

احترم نفسك حملة اطلقتها مجلة كلمتنا يارب تأثر فى الناس

يارب كل واحد ياخد الكلمة كـنصيحة مش كإنها تهزيق لا سمح الله

احترم نفسك .. قولها لنفسك لابنك لباباك لاخوك لصاحبك

الكلام كتير فى الموضوع ده ولسة متقفلش ....

العيب على مين ..... !!!!

العيب على اللى سابهم يقعدو على القهوة مساواة باكبار ....

واللا العيب على الشارع اللى بقى العيب فيه عادي وطبيعي

وان طلع العيب من اهل العيب ....

واللا العيب على البيت

واللا العيب على المدرسة .... ده لو العيال دول كانو راحوها من اصله

واللا العيب على النظام

واللا العيب على ايه بالظبط

منير ...... الملك ..... الوصف التفصيلي

بحرا من الاحاسيس والانفعالات
تسمعه وتشعر وكإن مصر كلها تتحدث
صوته وكإن نهر النيل يجري فى عروقك
كلماته عبرت عن كل الاجيال
احساسه يصل اليك دون ان يستأذن لانه احساسك انت بالفعل

غنا لكل ذرة تراب في مصر ولكل ام ولكل اب ولكل محب ولكل طفل ولكل شاب ولكل ثوري
باختصار .... غنا لكل مصري
تبحث في كلماته وكأنك تغوص في بحر من المشاعر ...

اما الالحان فهي الحان كل مصري الحان من تراب هذا البلد الذي لطالما عشقه وذاب في داخله
من اقواله ... ( كي تصل للعالمية يجب ان تصل الى داخل اعماق بلدك اولا )
فهو فى داخل كل بيت .... بل داخل كل قلب انه المصري ....

بكل همومه انه المصري .... بكل فرحته ونشوة انتصاره انه المصري ....

في ثورته انه المصري .... في حبه انه المصري ....

من اسوان والاقصر وقنا و القاهرة والاسكندرية وسينا

يحمل جلد الصعيدي وملامح الفلاح وقلب القاهري ومشاعر السكندري وعيون البدوي
بداخله قيود السجين وحرية العاشق

يحب جمهوره والذي هو مصر بكاملها ( لكل مطرب جمهوره ... انما انا فمعي شعب ) منير .....

الملك ملك لانه ملك قلوبنا وعقولنا ملك لانه يتحدث بلسان شعب باكمله
يتم تصنيفه مع سيد درويش وفؤاد حداد واحمد فؤاد نجم وصلاح جاهين

منير بحق مطرب الجيل بل الاصح مطرب مصر بالكامل على مر تاريخها

انا مش عارفني ........ !!!!!!

ايه ده ازاي ....

انت مين ياعم انت ...

ايه اللى بتقوله ده ....

امال ازاي يعني ....

وريني بطاقتك .....

كل دي افيهات او تعبيرات كلامية ممكن تطلع من البني آدم اللى قدامك لو سمع منك الكلمتين دول ((أنا مش عارفني))



بس لو فكرت فيهم هتلاقي نفسك اكيد فى يوم من الايام عديت بموقف فى حياتك اتصرفت فيه تصرف عجيب او غريب عن شخصيتك .


يعني ممكن تكون في يوم حاولت تروح ديسكو وانت مثلا شاب متدين وملتزم

او ممكن تكون فكرت تعاكس وانت شاب محترم ومهذب وعلى رأي صديقي ( مش متحرش )

عمرك فكرت تنزل البحر فى الغريق علشان تعوم


اي حاجة غريبة عن حياتك او عن طبيعتك او عن الوسط اللى انت عايش فيه وحاولت تعملها او فكرت حتى تعملها

ممكن يكون احساس فى حياتك

ممكن تكون فكرة مجنونة مختلفة تماما عن الطبيعي

يعني مثلا انك تمثل دور بواب عماره علشان تطلع تشوف حبيبتك اللى بقالك فترة مش عارف تشوفها

او مثلا فجأة تلاقي نفسك قاعد وسط مجموعة من المساطيل فى غرزة وانت اصلا لو شميت ريحة بيرفيوم اختك ممكن تقع من طولك

ممكن تكون اتحطيت فى موقف اضطرك تعمل حاجة مغايرة لطبيعة شخصيتك

زي انك تختلق قصة علشان تخرج بيها من مأزق حطك فيه المدير بتاعك ( وده الطبيعي فى كل الشركات دلوقتي )

او تتقمص دور المحب الولهان للمزة بتاعتك علشان تعيشها الخيال وتقتنع بيك وفجأة تلاقي نفسك بتقول كلام جااااامد وبعد ما تخلص تكتشف انك رومنسي او فى اللحظة دي بقيت رومنسي وغلبت عم الحاج قيس

ياريت كل واحد يدخل ويقولى امتى وفين كان مش هو.

عايزين نبقى زيهم ....... !!!!

الدكتور الرائع علاء صادق كان مستضيف فى برنامجه الجميل هنا القاهرة اللاعب الشاب شريف عبد الفضيل مساك اساسي فى فريق الاسماعيلي .
وسيبك بقى من اي سؤال او اي حاجة فى البرنامج واسمع الحوار اللى دار بينهم لما سأله انت بتحب تلعب وانت معاك ليبرو واللا تلعب بدون ليبرو .. يعني بالمعنى المفهوم (تلعب 5 فى خط الدفاع واللا 4 فقط )
وكانت اجابة اللاعب الرائعة تنم عن عدم تركيز هايل فى الحوار
اجاب اللاعب الشاب : انا برتاح قوي وانا بلعب مع معتصم وهاني سعيد
وتدارك الموقف الدكتور علاء وقال : يعني بتحب تلعب 3-5-2 واللا 4-4-2
اجاب اللاعب : انا نفسي العب 4-4-2
ساله الدكتور علاء : ليه
اجاب : علشان نبقى زي الناس اللى بره

وانا هنا اسمحولي وبكل قوة ومن كل قلبي ومن داخل اعماق مشاعري اقول ( يانهار اسووووووود)
هو بقى كل طموح اللاعب المصري او كل فهمه عن طريقة 4-4-2 او -3-5-2 انه بس الناس اللى برة بيلعبو بيها واحنا لأ
هو ده فكر اللاعب المحترف في الزمن ده .. ماشاء الله .. يعني على كدة بقى احنا مالناش فى الكورة علشان مش بنعرف نلعب زيهم مع ان يا أخي احنا الفريق الوحيد فى بطولتي افريقيا الاخيرتين اللى كنا بنلعب كدة وكسبنا الكاس مرتين
وكمان البرازيل فى كاس العالم 2002 كسبت العالم بنفس الخطة والمانيا وصلت قبل نهائي كاس العالم 2006 وهي بتلعب بنفس الخطة وحصلت على المركز الثالث بجدارة واستحقاق
هو أه انا بعترف ان الناس دول حاجة واحنا حاجة بس ده ميمنعش اننا المفروض حتى نكون بنفهم نلعب بطريقة 3-5-2 ونعرف واجباتها علشان نعرف الفرق بينها وبين اي خطة تانية
طيب هنا فى سؤال ؟ ملح ؟
هما الناس دي ليه بنحس دايما انهم بيلعبو كورة غير اللى بنلعبها بعيدا عن الخطط واسلوب الاداء
ليه هما اسرع .. ليه هما اقوى ... ليه هما امهر واذكى ... ليه هما أغلى ... م الآخر ليه هما أنجح
انا هجاوب اجابة مختصرة نوعا ما علشان مش بحب الرغي وعلشان ده موضوع يطول شرحه
اولا الناس دول واخدين الكورة والرياضة عموما اقتصاد وعلم وشغل فى المقام الأول .
ثانيا اسلوب تدريب وتهيئة النشء من الصغر مبني على اسس علمية وتقييم اللاعب من صغره حتى وصوله للفريق الاساسي مبيخضعش لمجرد مدرب بيقول رأيه فيه زي ما حصل مع نجمنا محمد زيدان وهو صغير . انما هناك بيخضع لاسس وقواعد
ثالثا وجود ادارة مدربة على العمل ده مش مجرد تطوعية وشغل على الهامش ، لا بيدرسوا كل خطوة هيعملوها ايه وبيسألو الغلط هنا منين ومن مين وهنعالجه ازاي علشان ميحصلش تاني ، وكمان بيبقوا عارفين مواردهم قد ايه وهيشتغلوا من خلالها ازاي علشان ينجحوا ويطوروها
رابعا وجود قواعد موضوعة من اتحاد اللعبة فى الدولة لا يتدخل فيها انتماءات ويلتزم بيها الجميع دون النظر الى مكانته او قيمته

م الاخر الناس دول فاهمين يعني ايه احتراف
الاحتراف يعني التزام .. تفكير .. ابداع ... اهتمام .. اندماج ... تركيز ... دقة ... تطور .. مهارة .. سياسة .. وعي ... وممكن نقول كلام كتير قوي مش موجود عندنا وموجود عندهم
بس بصراحة وكلمة حق ... شريف عبد الفضيل جدع ... علشان اعترف وقال حلمه انه عاوز يبقى زيهم ... وانا كمان نفسي نبقى زيهم

الفاهمين بيشجعو مصر ..... بس انا مش معاهم !

اصريت انى اكتب العنوان ده لسببين .. الاول لابدي اعجابي بطريقة الدعاية فى هذه الحملة اثناء وقبل والبطولة ... والثاني لان هو ده موضوعي ... (الفاهمين) .. كل ما تبقى قاعد فى اي مكان بتتفرج على ماتش تلاقي واحد او اكتر وربم تلاقي نفسك عمال تقول هو المفروض المدرب يعمل كذا وكذا وكذا .. وليه مينزلش فلان الفلاني ... علشان يغير من طريقة اللعب .. طب ليه ملعبش على الدفاع وامن .. الله هو ليه بيعمل ده معنده بركات برة ... حاجة بقى تخليك حاسس ان اللى قاعد بتسمعه ده مدرب الشرقية للدخان مثلا ، واللا بقى الكوميديا لما تلاقي شلة شباب واقفين بعد ماتش مهم وبيتكلمو عنه ... يقولك اللاعيب الفلاني عمل كدة علشان خايف من اللى كان وراه .. طب بذمة اهلك هو انت كنت سألته مثلا . او هو عمل التغيير الفلاني لانه شايف انه مش بيأدي فا غيره ونزل التاني علشان كدة ... ياعم طب قول اسباب عن فهم ... يعني بنزول اللاعب الفلاني غير طريقة الاداء من كذا لكذا واذكر الاسباب ماهو يا تتكلم وانت فاهم يا بلاش ... وانا هنا مش بقول للناس تبطل كلام بس اتكلم من غير ما تنرفز اللى قدامك او تفهمه انك علامة وانت اصلا متعرفش نصف قطر دائرة السنتر كام .
يعني ممكن اللى مش فاهم ده يبدى اعجابه بلعبه يبدي اعجابهع بتبديل او تذمته مننه بس ميحسسنيش انه لو قاعد على الدكة مكان اليكس فيرجسون كان جاب كاس انجلترا .
ويا سلام بقى لما تسمعهم بيتكلمو عن التحكيم ... يا عيني ع الكلام اللى ممكن تسمعه .. تلاقي اللى بيقول الحكم ده اصلا مش عارف يجري .. والكورة دي مش ضربة جزاء وهو اللى وقع نفسه والكورة دي مش تسلل وانا مش عارف ليه الحكم بحس انه بيشجع الزمالك علشان كدة بيحطوه على طول فى ماتشات الزمالك لا والكورة دي مش رمية تماس ....
كل ده على عيني والحكام فعلا بيغلطو ولولا اخطاء الحكام مش هيبقى فيه متعة فى كرة القدم لكن الحكم بيحسب الطأ فى جزء من الثانية وانت قاعد ماسك كوباية القهوة وقاعد بتتفرج على نفس الكورة من مليون زاوية بالكاميرات وبالبطئ وبتبقى محتار اوقات وبيختلف معاك اصحابك مش عاوز اللى بيحسبها فى جزء من الثانية يغلط ... يا جماعة ارحمونا بقى الكل بقى بيفتي وبيحسسني ان لو مانويل جوزيه مشي من الاهلي هيقدم ورقه وهيقبل وهيأمنو عليه كمان وهيقبض 1000 جنيه فى الشهر وهيكسب الدوري كمان وبطولة افريقيا ..... من قال لا اعرف فقد افتى .
يعني لو شوفت شلة من الشباب واقفين بيتكلمو فى الكورة وكل واحد فيهم بيحسسك انه فاهم ومفيش بعده ممكن تسأله شوية الاسئلة دول
- ايه فايدة النصف دائرة الموجودة امام منطقة الجزاء ( منطقة الـ 18) ؟
- طيب نصف قطر دائرة منتصف الملعب اد ايه ؟
- طب ليه بيحطو راية عند الكورنر وياترى ليه ده راتفاعها ومبيحطوش ليه عامود مكانها ؟
- طب هو الحكم ( اللى الناس كلها بتعيب عليه ده ) المفروض يجري فى اي اتجاه فى الملعب واللا هو بيجري كدة زي ما

تجيبه رجليه او ورا الكورة وخلاص ؟
- طب ازاي بيشاور مساعد الحكم على التسلل وليه بيبقى ماسك رايه مش ماسك عصاية مثلا ؟
- والحكم الرابع ده ايه ظروفه وموجود برة ليه ؟
- طيب امتى الكورة بتكون تسلل بالظبط ؟
- وليه فى كور بتيجي فى ايد اللاعيبة ومش بتتحسب اصلا اي حاجة ؟ وبرضه فى فاولات كدة ؟
- طب المفروض يقعد برة على الدكة كام فرد ؟
- هي اي فايدة المدير الفني والمدرب والمدرب العام وايه الفرق بينهم وبين مدرب الاحمال ؟
سؤال واحد من دول كفيل انه يثبت للناس كلها ان الكورة مش مجرد لاعب راح او جه او مدرب كويس او وحش او تبديل فى وقته
الكورة علم وثقافة ورياضة بتشجع على الجماعية فى الاداء من اول عامل غرفة خلع الملابس وحتى رئيس النادي مرورا باللاعبين والمدربين وحتى مشجعي الفريق .


اسلام منسي

ماتيجي نضرب ...... !!!

من يومين كدة شوفت واحد بيقول لواحد تاني
- بكرة هتعمل اضراب معانا
- اضراب ... اضراب مين ياعم .. وهنضرب مين
- لا يا عم الحاج هنعمل اضراب
- وايه بقى الاضراب ده ان شاء الله .. وليه طلعت فى دماغكو تعملوه اصلا
- الاضراب ده معناه اننا هنعترض على موقف معين والموقف هنا هو زيادة الاسعار
- طيب هتعمول الاضراب ازي
- مفيش يا سيدي محدش هينزل من البيت ولا هنبيع ولا هنشتري حاجة اليوم ده
- ياه بس كدة ... ؟
- اه شوفت سهلة ازي
- خلاص وانا معاكو ......

شوفتو الاضراب كان بيحصل ازاي فى بلد المفروض عندها حضارة وثقافة 5000 سنة
بزمتكو وانا راضي ضميركو الحي او الميت لان محدش ضامن حاجة اليومين دول انا عايز اسأل سؤال
حد بجد يقدر يشرحلي ازاي نعمل اضراب ...
لا وايه فى بلد متعرفش اصلا يعني ايه اضراب
يا راجل ده احنا بنعمل المظاهرات غلط ... مبنعرفش نعترض على حاجة اصلا
مفيش عندنا ثقافة الاعتراض غير كلمة لأ ... حتى كلمة لأ بنقولها فى اوقات غلط وعلشان كدة مش بتتسمع
انا بس حبيت اقول كلمتين فى الموضوع ده
بلد متعرفش تعمل مظاهرة ولغاية دلوقتي مبنعرفش ننتخب مش رئيس جمهورية لا ننتخب واحد يتكلم عن لساننا فى اي مكان .. ومعندناش ثقافة الرأي والرأي الآخر من الاساس .. وكمان مفيش اي تنظيم منظم تخيلو يعني كلمة تنظيم نفسها دي بتديلك ايحاء ان الناس دول عاملين خطة لنفسهم علشان يعملو حاجة ... لا تلاقي برضه فى داخلهم مفيش هدف محدد وتايهين فى نفسهم ولازم بيكون جواهم شواذ عن القاعدة وكتير مش مجرد عدد محدود
يبقى ازاي هنقدر نعمل اضراب عام مرة واحدة على مستوى الجمهورية .. واصلا محدش فى الجمهورية ذات نفسها يعرف معنى الاضراب ولا هيتعمل ازاي وايه مهمته هو كبني ادم فى الاضراب ده ...

يا جماعة احنا بلد ماشية بالعكس بنقعد نظبط فى الهرم من فوق وسايبين القاعدة من تحت ولا هي هنا اصلا يعني الحكومة ورجال الاعمال والشركات ماشية فى طريق الاستثمار والرأسمالية والعولمة والكلام اللى محدش فاهمه لغاية دلوقتي والحكومة دي نفسها بتتعامل مع المواطن من منطلق انه فاهم هي بتعمل ايه وهو اصلا مش عارف حاجة .. يعني لا يعرف معنى خصخصة ولا عولمة ولا استثمار ... لا وايه كمان اللى الواحد اكتشفه قريب وعلى لسان وزير المالية ان مفيش حد فى البلد يعرف يعمل موازنة للدولة غيره ... (بعيدا عن يعني ايه موازنه) بس ده يبقى كلام بالزمة .... الحكومة بقت رأسمالية والشعب لسة بيتعامل معاها على انها اشتراكية .. يعني الناس فى وادى والحكومة فى وادى ... عايزين ننتخب رئيس جمهورية ونائب للدايرة واصلا واحنا صغيرين كان بيتفرض علينا الالفا بتاع الفصل ومحدش عارف مننا هو ليه بيبقى هو الالفا ... يبقى ازاي

ان تكون shnieder .......... اسلام منسي م الاخر !!!

مش عارف ليه حاسس انى خايف اتكلم عن نفسي
بس قررت وسميت بالله وقلت ياللا اديها يا واد

ان تكون shnieder

يجب ان تحب ربك بشدة وتبكي حين تتحدث اليه وحدك

ان تكون shnieder

يجب ان تعشق سيدنا محمد صلى الله عليه وسلم وتحاول ان تتخذ من تجربته الاسوة الحسنة فى اعمالك

ان تكون shnieder

يجب اولا ان تتعجب لتعلقك بهذا الاسم .....

ان تكون shnieder

يجب ان تتذكر دوما كل من حولك حتى من تقول انك تكرههم وتتذكر كل ثانية حلوة قضيتها معهم

ان تكون shnieder

يجب ان تحب كل من حولك دون ان تستطيع التعبير عن مشاعرك ...

ان تكون shnieder

يجب ان تشعر بانك معقد نفسيا مع انك فى الاصل بسيط وتخلو من اي مشاكل نفسية او معارك مع الذات

ان تكون shnieder

يجب ان تتحمل تصرفات الاخرين وخصوصا المقربين منك وتجد لهم العذر دائما

ان تكون shnieder

يجب ان تملك امكانية التركيز فى عمل عدة اشياء فى آن واحد ( يعني انا بكتب الموضوع وانا بشتغل )

ان تكون shnieder

يجب ان تكتب الشعر وتتوقف دون اي سبب وتشعر بانك افضل الشعراء حين قراءة مخطوطاتك

ان تكون shnieder

يجب ان تعشق الاهلى دون ادنى تعصب وان تعجب بالزمالك حين يلعب بفن وهندسة

ان تكون shnieder

يجب ان تلعب الكرة حتى وانت فى احلك ظروف المرض والارهاق

ان تكون shnieder

يجب ان تعشق مصر دون معرفة السبب

ان تكون shnieder

يجب ان تذوب فى احساس منير الصادق بمصريته وان تسبح بخيالك حين سماع فؤاد وان تشعر بالاعجاب تجاه اسلوب عمرو دياب
وان تعشق احساس انغام وقوة صوت اصالة ودفء اليسا وشقاوة نانسي و تهييس ام تي ام وابداع واما ورقة عايدة الايوبي
ولا تنسى الاستماع الى احمد منيب

ان تكون shnieder

يجب ان تعشق اللون الازرق ....

ان تكون shnieder

يجب ان تملك الاحلام وتشعر بانك قريب من تحقيقها ولكنك ايضا لا تحاول تحقيقها

بس الحمد لله انا بدأت

ان تكون shnieder

يجب ان تثق في اصالتك وطيب معدن شخصيتك وحب الناس لك ...... ان شاء الله

ان تكون shnieder

يجب ان تكون سريع التسامح دون ان تنسى

ان تكون shnieder

يجب ان تكره التردد والكذب

ان تكون shnieder

يجب ان تصبح اجتماعي جدا .... مع انك تفضل ان تكون وحيدا

ان تكون shnieder

يجب ان تشعر دوما ان هناك شئ ينقصك

ان تكون shnieder

ان تكون راض ...... دون انكسار الطموح

ان تكون shnieder

يجب ان تنتظر الفرصة لانها هربت في غفلة منذ زمن بل وتحاول ان تذهب انت للفرصة

ان تكون shnieder

يجب ان تشعر بانك لن تلتلقي بحبك ومع ذلك دوما تنتظره

ان تكون shnieder

يجب ان تسخر نفسك دوما لخدمة الاخر دون ان يمس بشخصك

ان تكون shnieder

يجب ان تكون مرحا خفيف الظل مبتسما دائما وانت بالداخل تغلي وتملك كئابة تغطي العالم باسره

ان تكون shnieder

يجب ان تمتلك الثقة بالنفس وتحاول دوما الابقاء على هذا الشعور

وان كان عاجبك ..... !!!!

اقرا وقولي لو كان عاجبك ...

- شاب فى مقتبل حياته العملية ولسة متخرج .. ميلاقيش حتى مكان يتمرن فيه على شغله اللى المفروض هو اتعلمه فى الجامعة .. ولو اتمرن يلاقي ان اللى اتعلمه مالوش علاقة بالشغل ..ان كان عاجبك ؟
- راجل فى سن الخامسة والثلاثين متزوج ويعول ويلاقي كل يوم نفسه فى الشغل انه لازم يقعد تلت ساعات كمان زيادة ومفيش اجازات حتى المتفق عليها مع صاحب العمل علشان يخلص شغل للشركة المفروض كان يتعمل من قرن مضى تقريبا .. ومفيش اوفر تايم ولا اي تقدير .... وان كان عاجبك ؟
- شاب متخرج من كلية مرموقة بتقدير ممتاز وميتعينش معيد فى الكلية بتاعته ويتعين ابن الدكتور المتوصي عليه ... وان كان عاجبك ؟
- معيد فى الجامعة قد الدنيا بيقبض ما لا يزيد عن 250 جنيه مصري فى الشهر ومطلوب منه يعمل ابحاث وتقارير ويشتري كتب ويكون نفسه و يحضر للماجيستير ..وان كان عاجبك ... ؟
- مدرس فى وزارة التربية والتعليم بيقبض ماشاء الله 170 جنيه بعد الحوافز ومطلوب منه يحقق حلم حياته ويكون بيت واسرة ويطلع نشئ صالح للمجتمع ... وفي نفس الوقت مش عايزينه يدي دروس خصوصية علشان ياكل لقمة عيش ... وان كان عاجبك ؟
- فريق كورة اقل واحد فيه بيدخل جيبه شهريا على الاقل عشرة الاف جنيه وفى نفس الوقت دكتور فى المستشفى قد الدنيا مرتبه ميزيدش عن 700 جنيه لا غير لا وبيقعد نبطشيات وبيتصلو بيه فى اي وقت علشان زميله اللى المفروض يبقى موجود بيصيف فى اسكندرية .... وان كان عاجبك ....؟
- كلية علوم من غير معامل لاعداد التجارب ... وان كان عاجبك ؟
- رجل اعمال سرق 700 مليون جنيه وطفش وبيتحايلو عليه يرجع ومفيش قرار صدر ضده ... وواحد سرق رغيفين علشان ياكل ولاده اتقبض عليه ومخرجش من الحبس بقاله شهرين .... وان كان عاجبك ... ؟
- رجل اعمال يتبرع بمليون جنيه مكافأة للنادي علشان انجازه .. وطفل يتبرع بربع جنيه علشان دار للايتام ... وان كان عاجبك ... ؟

صدق او لا تصدق

تصدق ... هتصدق ان شاء الله
لو قلتلك دلوقتي ان عصام الحضري هيلعب فى مانشستر .... هتصدقني
طيب لو قلتلك ان فيه تغيير وزاري قريب جدا ... هتصدقني
ورئيس نادي الزمالك الجاي هو حمادة امام ...تصدقني
طب رغيف العيش هيبقى بجنيه .. هتصدقني
طب ليه اصلا هتصدقني ...
عمرك سمعت حد بيصدق حد اليومين دول ، طيب يا اخي ليه بتقول هتصدقني مش تفكر الاول , ربنا بيقولك اعقلها فتوكل .. يعني شوف الاول الموضوع ده ينفع واللا لا ... اصدق واللا مصدقش
بصراحة انا عن نفسي بقى صعب جدا اثق فى اي بني ادم على وجه الارض . الاب حتى بيوعد ابنه ويقوله لما نروح هبقى اخليك تلعب اتاري ولما يروحو يقولا لا انت لازم تنام ... يبقى ازاي هيطلع واثق فى بباه .
طيب فى المدرسة .. الولد من دول يسمع فى التليفزيون او يسمع بباه بيتكلم عن تحسين المناهج ومش عارف هيدرسوا ايه ازاي وعن معامل كمبيوتر لكل الطلبة فى كل مدرسة وكل الشغل الحلو ده .. يدخل الولد المدرسة يوم 15/9 كالعادة ولا يلاقي المدرسة فيها مكتب زيادة حتى ولا كمبيوتر موجود فى مكتب سكرتير المدرسة كمان ولا اي حاجة .. قولولي ازاي الولد ده يطلع واثق فى برامج التلفزيون او فى الحكومة اللى كل يوم بتوعد بالكلام ده .

معرفش فى الاخر ممكن تصدق واللا لا ......ز بس اقولك هتصدق ان شاء الله .

ممكن نتعرف ..... ؟

بصوا من الاخر

انا بحس ان الكلام على الماسينجر حاجة ولما يبقى وشك فى وش اللى بتكلمه حاجة تانية

قدام الناس المشاعر وضحة والتعبيرات مباشرة عاملة زي الفرق بين السينما والمسرح كدة

على المسرح بتقول الجملة وبتلاقي رد فعل المتفرج مباشرة يا اما عجبته يا اما بيقول جوا نفسه ايه دي مالهاش لازمة

وممكن تحس ساعتها على طول ان انت حاجة تخنق ولازم تتعامل مع اللى قدامك بطريقة تانية ،

انما فى السينما بتقول الجملة والمخرج بيظبطلك طريقة نطقها وبتكررها مرة واتنين وتلاتة علشان تطلع بالمعنى السليم وتعجب الجمهور .

يعني جرب كدة تتعرف على اي بني ادم ولد او بنت على النت وتشوف صوره ياعم وكاميرا وشغل وتتاكد انه هو ده فعلا الشخص يعني مفيش بقى شغل انه ولد وعامل بنت او شئ من هذا القبيل ،

وبعدين اتفق معاه او معاها على ميعاد للمقابلة بعد فترة صداقة طبعا على النت

وخلاص جه اليوم الموعود واتأنتكت واتشيكت وحطيت البرفان الفرنساوي الاصلي الخاص بالمناسبات الهامة اللى زي دي ولميت اللى ع الحبل كله

وقعدت تختار وتنقي وسميت بالله وروحت متكل على اللى خلقك ، وهنا تجد المفاجاة وتجد نفسك ما بين امرين ( العدو امامهم والبحر من خلفهم )

يا اما تلاقي اللى قدامك شخص خنيق غير اللى انت قابلته ع النت او تلاقيه بيأكدلك اللى انت شايفه اكتر واكتر في الحقيقة عن الانترنت وده لانه زي ما بيقوله الانطباع الاول يدوم ....

يعني انا ممكن اكون واخد فكرة عنك انك شخص رجولة واخلاق وشياكه ومش عارف ايه وعسول لكن نيجي بقى اول ما اشوفك احس بالعكس تماما .... ي

بقى عندنا هنا علامة استفهام ماشاء الله فى حجم الهرم الاكبر بتقول طب هو فيه ايه ... مين ده ؟

التفسير الفلسفي او المنطقي او العلمي او بالفهلوة كدة ان الشخص اللى قدامك ده .. وهندي مثال بسيط على الموضوع بانك كنت بتلاقيه بيهرج وبياخد ويدي معاك ومبيسكتش وهو على الانترنت وفاتح الميل معاك وهاتك يا رغي ...

وفجاة لما قابلته لقيته شخص يسوده الغموض وساكت معظم الوقت ومش جرئ بالمرة وساعتها تفتكر الجملة الشهرية لعمنا خالد الصاوي ( يا مان انت خنيق ... ! )

قالك هنا بقى ان الشخص ده شخص فى الاساس مش جرئ وبياخد من شاشة الكمبيوتر الساتـر الترابي اللى بيقدر يخفي خجله وراه..

وجرأته فى التعامل دي ناتجه عن انك مش شايفه هو بيقول ايه او قاعد ازاي ساعتها وفى الارجح هو فى الحقيقة بيبقى شخص مش واثق فى نفسه ومنطوي الى ابعد الحدود ومش لاقي حد معاه وكان بيدور على شخصيته دي فى شاشة الكمبيوتر وخلف ستار الانترنت .

قوم جم شوية العلما الظراف اللطاف بتوع علم النفس لما سألوهم عن المشكلة دي ( انا عن نفسي بقول عليها حالة زي الدكاترة دول ) وقالوا :

ان نسبة التاكد من المعلومة او من شخصية الفرد بتصل الى نحو 90 % عند المواجهة الشخصية

وتصل الى 60% تقريبا عن التحدث من خلال الهاتف ده لو كان الشخص معروف من الاصل وبتقل النسبة دي خلال الهاتف الى 40% لو الشخص مش معروف بالمرة

وتتراوح مابين 20% الى 30% عند الكلام على الانترنت .

يعني م الاخر مش كفاية انك تقول انا بكلم فلان على الانترنت علشان تحدد علاقتك بيه وحبك ليه او حبه ليك او ايا كانت نوع العلاقة اللى بتتمناها .. لا لازم تشوفه وتقعد معاه

سيدنا على بن ابي طالب قال ( تكلم حتى أراك ) يعني الكلام مهم جدا علشان تشوف داخل الشخص اللى قدامك

والمثل الشعبي بيقول ( تعرف فلان؟ .. اه .... عاشرته؟ .. لا ... يبقى متعرفوش .......... )

ومازال يشعر بالحياه ... ؟

من زمان ليس بالبعيد .... كان هناك قلبا يطوف بالعيون مثل فراشة بين زهور الربيع ..

يكتب ما يحلو له .. عن القلب المتحجر ... والقلب الهادئ ... والحب المتبادل ... وحب الاب لابنه والمواطن لامه .... اقصد لبلده

وفجأة اخذت كلماته فى السقوط واحاسيسه فى الاختباء وسط غوغاء الحياه ومتاعبها المتراكمة

وصار يجري بقدم واحدة وبالتالي اخذ يدور حول نفسه داخل مشاكل الحياه وسباق الفرصة ومتاعب العمل الاجبارية

.......

الى ان توقف تماما نتيجة بتر قدمه الاخرى وصار ساكنا لا يرى او يسمع اقصى ما تتيح له نظرة عينيه او مدى قوة حاسته السمعية

وكم كان هذا الشعور مؤلما ... ؟

ان تأخذ من الطفل الشعور بالفرحة والنشاط والمرح

ان تأخذ من الام احساس الامومة

ان تأخذ من البنت احساس الجمال

ان تأخذ من الوردة الشعور بالدفء

الى ان هبت داخل اعماقه رياح التغيير ......... !

وبدأ مرة اخرى فى زرع الامل بداخله من خلال الهروب من الافكار المعقدة التى كانت تحوم حوله لتعمي عينيه عن قدم جديدة بدأت تنبت

والان بدأ مرة اخرى ليحاول السير قدما نحو الضوء ...

واخذ ينهض متشبثا بالامل فى الحياه فى ان يكون وان يصبح موجودا مؤثرا فى الحياه وليست هي فقط من يؤثر فيه

................... قصة واقعية يسردها خيالي ....................